ذات المشهد يتكرر يوميا على طريق النبطية…”أبو علي” الستيني يحمل زهوره بلهفة ليضعها على قبر زوجته..”رايح شوف مرتي اللي بحبها”
كتب السيد جعفر فرحات على صفحته ما يلي:
اليوم كنت راجع من النبطية …شفت حج كبير عالطريق اسمو ابو علي عمرو شي ٦٠ سنة حامل بإيدو ورد غاردينيا و جوري مقطفن من غرسة عطريقو ؛
عم يوقف مين ما كان بلهفة و مستعجل كأنو رايح على عرسو و مأخر او كانو معزوم عشي محل و دايق الوقت …
وقفت طلعتو قلتلو لوين حج ..قلي عند مرتي , قلتلو مبين من طلعتك رايح عند حدا بتحبو كتير يلا طلاع طلاع بأمرك … عطاني وردة من الورد قلي هاي مني الك يا ابني و الباقي لمرتي…
مشينا شوي, قلي يا ابني صرلي ٣ سنين كل يوم نفس المشهد بوقف عالشارع بوقف مية واحد ليطلعلي ابن حلال بس كرمال روح شوف مرتي البحبها ..
مشينا بعد شوي قلتلو يا حج بس نوصل قلي وصلنا والله يخليكن لبعض وبخليلكن هالحب…
وصلنا لحد الجبانة …قلي يا ابني انا نازل هون بدي حطلها الورد عقبرها كل يوم بجي بحدثها وبقعد انا وياها بهل وقت و بروح..الله يخليك و يحميك و ما تنسوا الفاتحة و بتشكركن من قلبي …
