ردّت الممثّلة الكوميدية الناشطة عبر وسائل التواصل الاجتماعي، أمل طالب، على الحملة التي تعرّضت لها بعد إطلالتها عبر برنامج “لهون وبس” على الـ”LBCI” مع الإعلامي هشام حدّاد، لا سيما اتّهامها بتقليد لهجة أهالي منطقة بعلبك وتقديم صورة مسيئة عنهم.

وخرجت طالب عن صمتها، ووصفت الحملة التي تتعرّض لها بأنّها حملة “تنمّر”، وقالت عبر صفحتها على موقع “فيسبوك”: “بعض أهل بعلبك تركوا الدني وتفضولي.. ونازلين فيي بوستات ومساجات وتغريدات ونصّن إذا مش أكتر فار دمّن و دقّتن الحمية وهني مش معذبين حالن يسألوا أو يشوفوا أني عن شو بحكي…”.

وتابعت: “خلص بتحكي بعلبكي عالتلفزيون… يا باطل.. كيف منقبلها عحالنا… حدا يحكي لهجتنا..

بس أمل طالب من بعلبك.

لاء بدنايل مش ببعلبك.

مبلا بدنايل قضاء بعلبك.

خلص ما بهم ما تحكيش بعلبكي وخلص.
بس ماهوي من ضهر البيدر وطلوع العالم بتحكي لهجة ضيعوية وبتشاركوا الهم والشحار والزربة وتسكير الطرقات والوجع والحرمان
إيه بس في حدا حط ّبوست انه كيف أمل طالب بتحكي بعلبكي وكلنا لازم نعمل شير عالعمياني….”.

وأضافت: “انه تركته الدني ولاحقيني عالكلمة؟عاللهجة؟
نص القلعة انزقت واني اخدت اللهجة تأثرتوا؟

معكن حق.. ما اني لما حكيت اللهجة جويت الليطاني وعم خلي السرطان ينغل نغل..
اني طفيت الطرقات وخليت العالم تعمل حوادث وكل يومين يمتلنا شاب وتتشحر امه
اني سيبت الشباب بلا شغل وزقيت التلاميذ بالشتي عالفويهات لأنّه ما فتحت جامعات ببعلبك
بدكم اكتر..

اني اللي مفلتي الرصاص الطايش بالهوا…
واني اللي مش مخليي البطاطا تتصرف لبرا

واني اللي مش مخليي سايح يفوت عالقلعة..
اني أمل طالب.. تشمشطت ونزلت بالفانات واحترق سلافي وعملت اختصاصين وكفيت 2 ماستر وكان حلمي مثّل..”.

وختمت منشورها بالقول: “يا جماعة انتو اللي لازم يمثلوكم مش ساءلين فيكم.. ناطرين اني مثّلكم.. اني بمثل حالي بس”.