“على قول المثل..لبيعرف بيعرف واللي ما بيعرف بيقول كف عدس…. بقلم الأستاذ خليل بواب
صديقي جورج من حوالي السنتين ودعني قبل ما يهاجر على كندا هويي ومرتو واولادو التنين اجا وقالي يمكن ما نرجع نشوف بعض رايح روحة بلا رجعة مش قادر عيش هون، قلتلو نيالك عقبال عنا… بيوم عصرية نهار حبيت طل طلة عالمينا شفت شخص بيشبهو قاعد ع صندوق شبك البحرية على رصيف المينا ترددت اندهلو هويي و مش هويي قربت وقلت مين جورج اطلع فيي وقام حضني بحرارة، قلتلو شو جابك على هالبلد واحد عايش بكندا وكل أسباب الراحة تحت خدمتو بيجي على التعب والذل والحرمان..
قالي أسكت بلا كترة حكي مستعد عيش هون بالعذاب ولا اني موت وحيد بالغربة، قلتلو ليش؟ قال هونيك ما في حدا لحدا ولا حدا بيطلع بحدا أو حتى بيعرف حدا الناس عايشين ماكينات شغل لا اكتر ولا اقل ما في روح ولا حياة اجتماعية اذا جار مات بشقتو جارو ما بيعرف فيه غير لما تطلع ريحتو لك بتلفن لأي ولد من اولادي بدي شي ضروري اذا رد عليي بيقول Sorry dad مشغول مش قادر احكيك
لك محبوس اني وهالمرا بالبيت بياخدونا مشوار كل أحد منقضيها على الاوتستراد 300 كيلو متر بالروحة لنوصل و300 بالرجعة عالبيت وبالمطعم مجبور تاكل من أكلن وبالشوكة والسكينة مش عم بشبع يا زلمي ضاق خلقي، يا خيي هون بتعيش بحرية ما حدا الو معك شي ولا بيطلع بلونك ولا بشكلك بيكفي بالشارع بتسلم عالكل والكل بيسلم عليك بتقعد عالقهوة وين ما كان ومع مين ما كان بتعرفو ما بتعرفو بتكون مبسوط بالناس الطيبين.. حملت حالي اني ومرتي ورجعنا والاولاد عم يشتغلوا الحمد لله ومن لما رجعت رجعتلي الحياة وما عدت شعرت بالزهق والوحدة… ولما سألتو شعورو بالبعد عن اولادو قال لا أني بقدر عيش عيشتن ولا طموحن بيسمحلن يبقوا بالبلد!
