قال “النائب جبران باسيل”: “بالـ 2018، وقفت معكم هون وحلمنا سوا. كنّا ببداية عهد متأملين فيه ومدركين لصعوباته… اليوم، بدّنا نعتذر. مش لأنّو وعدنا، لأنّو تأمّلنا. مش لأنّو تخاذلنا، لأنّو حاولنا، مش لأنّو هربنا، لأنّو واجهنا. مش لأنّو ساومنا، لأنّو تفاهمنا. منعتذر لأنّو ما قدرنا نبني دولة نحنا وياكن”.
وأضاف: “ما خلّونا، يعني ما خلّوكم. وكمان نحنا ما خلّيناهم: ما خلّيناهم يوطّنوا النازحين، بس ما خلّونا نردّهم على وطنهم. ما خلّينا داعش تحتل ارضنا، بس ما قدرنا نشيلها من عقول البعض”.
وتابع: “ما خلّينا اسرائيل تغزي مياهنا وتسرق غازنا، بس ما قدرنا لليوم نستخرجه ونستفيد منه. ما خلّيناهم يحطّوا ايدهم على مرافق الدولة، بس ما خلّونا نسترجع اموالكم. ما خلّيناهم يعملوا كابيتال كونترول يحمي مصالحهم، بس ما خلّونا نعمل كابيتال كونترول يحمي ودايعكم”.
واستكمل: “نحنا منعنا السلبي وهنّي منعوا الايجابي؛ بس النتيجة طلعت عاطلة على الشعب اللبناني. الشعب مش مسؤول عن الأزمة، بس مسؤول عن محاسبة يلّي سبّبوها, ومنعتذر، مع انّو خفضنا كتير كلفة الخليوي والثابت بايامنا ودوبلنا مداخيل الدولة، و”تربلنا” عدد المشتركين. الوزارة مش معنا، والخدمة بأسوأ حالتها, ومنعتذر، مع انّو عملنا مراسيم الغاز ولزّمناه، ولكن لليوم الارادة الدولية اقوى منا، وما قدرنا بعد نستثمره، ولو قدرنا نحميه من الفساد”.
وقال: “منعتذر، مع أنّو اطلقنا 8 سدود بأيّامنا، اجت 17 تشرين واوقفت التمويل وما كنّا خلصنا الاّ 3 او 4 منهم؛ وانحرموا اللبنانيين من الاستفادة من جنة وبلعا وبقعاتا وبسري. والمسيلحة بعد ما اكتمل, ومنعتذر، مع انو عملنا احسن خطّة كهرباء باعتراف خصومنا، لتجي 24/24 بالـ 2015، ولزّمنا عقودها بأرخص الأسعار باعتراف شركات العالم، ولكن قرارهم بالعرقلة كان اقوى، وقدرتهم على عدم دفع المال كانت كافية لتوقف المعامل والخطة. بالنهاية اللبنانيين محرومين من الكهرباء، حتّى لو مش نحنا السبب
