بكلمات مؤثرة نشرها على صفحته على موقع التواصل الاجتماعي “فيسبوك”، توجه الزميل “محمد ضامن” لأمه بعد انتصارها على “الخبيث”، فكتب:

“عادة ما بحب احكي عن حياتي الخاصة او عن عائلتي عل الفايسيوك، بس في تجربة صارت معنا بالبيت وعبالي اتشاركها معكم، تجربة الله يبعدها عن كل احبابكم واصحابكم واهلكم،

بيقولوا الدنيا ” أم”، بس ما منعرف قيمة هل كلمة إلا لما ” الأم” تكون بخطر، او بأزمة، ساعتها الكون كلو بعيونا بيصير يقول ” يا أمي”،اليوم كانت آخر جلسة علاج لوالدتي من المرض اللي كنا نسميه ” هيداك المرض”،

أمي اليوم انتصرت عليه وتوجهلو الضربة القاضية ولح نبطل نخجل فيه، بالعكس اليوم امي والكون كلو لح يقول” هزمنا السرطان وما ركعنا”،

أمي، بعد ٨ شهور من الوجع والتعب والخوف والكيماوي والجلسات والجهد والقلق وعدم النوم، بعد رحلة مع هل العذاب ، بكرا لح نبلش ببيت نبيل ضامن حياة جديدة، كون جديد، وعالم اجمل واحلى…

قد ما احكي عن امي، عن الوجع، عن الخوف، عن الرعب، ما ممكن اوصف كيف شعور الانسان بس ” الهيداك” يصير ” هون”، ببيتك، قدام عيونك، عم يهاجم اغلى ما تملك ، امك

٨ شهور علموني انو ممنوع بقا اترك امي ولو للحظة، لانو اللحظة مع امي بالكون كله،
انا اليوم مبسوط، وعم اضحك لانو أمي مش بس انتصرت عل السرطان، امي انتصرت ع نفسها وعلمتنا درس جديد بالحياة ” اوعا توقفوا، واذا سقطتوا ما تركعوا”،

اليوم بدي قلك يا أمي ” بحبك كتير”، يمكن بمجتمعنا ما منعرف كتير نعبر عن حبنا وعشقنا للام، هيك قال مهدي ياغي، وهيك عنجد انا حسيت،

امي حابب اعبطك، برجعتك رجعت الدنيا ع بيتنا، رجع بيي معك، رجعت ضحكتي وحياتي،

وعنجد الدنيا ” أم” والله لا يحرم انسان من امه.

ام محمد، بحبك كتير… قد ما كرهت السرطان.”